نعمه السيد تكتب: أنا لسه حي
خدلك أجازة من الألم ومن الجراح
ومن اللي عدى واللي راح
أدخل دروب الحلم واخرج للبراح
كسّر بيبان العتمة
وإنت تلاقي ضي
واثبت لنفسك إنك إنت
لسه حي
ارسم خيالك وردة بتنادي المطر
إنحت آمالك مية بتشق الحجر
عصفور وبيته في الفضا
مش ع الشجر
خليك تملي زي صوت طالع يدوّي في السكون
ومالكشي زي
واثبت لنفسك إنك أنت
لسه حي
أيوه أنت حي
لسه جواك الحياة
لسه جواك الأمل في الحلو جي
لسه جواك ألف رغبة في الانتصار
ع اليأس صانع المرار
احجز لنفسك جنب نجمة في السما وهتبقى جار
جار للقمر
ده إنت القمر وأنت النجوم
لو عشت يوم
شايف في نفسك كل حلمك
قول لنفسك
واثبتلها
أنا لسه حي
أنا لسه حي
تعليقات
إرسال تعليق